Wobłuk zamołwitosće
Wokrjes Budyšin je z 2.390 kwadratnymi kilometrami po płoninje najwjetši wokrjes we
Swobodnym staće Sakska. Swoju dźensnišu formu dósta wón 01.08.2008 přez zjednoćenje
něhdyšeju wokrjesow Budyšin a Kamjenc, kaž tež přez prjedawše bjezwokrjesne město
Wojerecy. W někotrych gmejnach wokrjesa witaja hosći tež dwurěčnje (Witajće k nam!),
přetož tu bydla nimo Němcow tež Serbja.
Wokrjes wupřestrěwa so wot braniborskeje hranicy w sewjeru, z Kinsporsko-„Ruhlandskej“
holu w zapadźe a z Hornjołužiskej holanskej a hatowej krajinu we wuchodźe, přez
Hornjołužiske hona hač k Hornjołužiskim horam (wobchadnorěčnje tež „Horni kraj“
mjenowany) w juhu.
Přez začopjenje wulkokrajinow horinow, pahórčinow a nižinow eksistuje bohata a jónkrótna
fawna a flora. Wokrjes wopřija 25 škitnych krajinow, 18 přirodnych krajinow kaž tež 16.622
ha cyłkownje 30.102 ha wobsahowaceho biosferoweho rezerwata „Hornjołužiska holanska a
hatowa krajina“.
Tež hospodarsce wobdźěłane płoniny su w našim dźěłowym wobwodźe wšelakore. W
poměrnje krótkich wotstawkach měnjeja so wuměnjenja, kotrež su přez wliwy lodoweje
doby nastali. Charakteristisce za Kinsporsku-Ruhlandsku holu a Hornjołužisku holansku a
hatowu krajinu je niska kwalita pódy, su chuduške wutki a njedosahace zastaranje z wodu
přez snadny wodoskład pódy. W Hornjołužiskich honach a předewšěm w Hornjołužiskich
horinach steji wjace wody k dispozicij. Póda je tu wunošniša a wosebje mjez Kamjencom a
Budyšinom hlinjana.
We wokrjesu so někak 100.000 ha pódy ratarsce wužiwaja. Rozdźěl kwality a hódnoty pódy
pohibuje so mjez 17 a 80 dypkami. Dźěl ratarsce wužiwaneje pódy leži w za ratarstwo
njepřihódnych kónčinach. Dalša wosebitosć je hatowa krajina (mniša su ju zapołožili), kotraž
wupřestrěwa so na někak 3.700 ha a w kotrejž so wosebje karpy za regionalnu a
nadregionalnu potrjebu produkuja. Kedźbuhódne je tež plahowanje chmjela na někak 100
ha.